Zur eta lur geratzen ari gara, aspaldiko partez gainera. Ez da ulertzen. ERCkoak, independentziaren alde egon behar ziren lehenengoak, nola atzera egiten ari diren, etengabe.

Azkena gogorregia izan da, hauteskundeen emaitza aldatu nahi izatea, Europako Justiziak hankaz gora jarri duen Llarena moduko sasepaileari kasua eginez eta Puigdemonti eta beste diputatu batzuei haiei dagokien kargua kenduz eta, gainera, nazionalisten gehiengoa ere arriskuan jarriz.

Hautestontziek lortu ez zutena (espainiarrek irabaztea eta Puigdemont baztertzea) ERCk egin?

Gogoratu beharra dago Madrileko epaileek Eusko Legebiltzarrari Herri Batasunaren talde parlamentarioa desegiteko eskatu zioenean, uko egin zitzaiola eta hori dela eta hiru parlamentari inputatuak izan zirela, Juan Maria Atutxa (EAJ),,Gorka Knorr (EA) eta Kontxi Bilbao (EB-IU), eta azkenean Europak ebatzi zuela arrazoia zutela. Hau da, Kataluniako Legebiltzarrak badu aurrekari hori epaileen eskua haien eremuan sartzen ez uzteko baina kasu egin diote nori eta Llarena epaileari, zuzenbidea zer den ez dakiena, Belgika eta Alemaniako justizia sistemek erakutsi diguten bezala.

Gainera, ERCko batzuen adierazpenen arabera, tripartitua berreskuratu nahi dutela dirudi (autodeterminazio eskubidea onartzen ez dutenekin bat egin??)